كيكة الموز بالجوز

أنا لقيت الطريقة على النت فى أكثر من موقع ...
وكل موقع بيحط مقادير مختلفة ...
بعضها يكون الدقيق قليل والبيض كتير ...او السكر قليل ..وممكن فى زبدة سايحة أو زيت ...لبن أو زبادى ...
يعنى بصراحة كده انا دماغى كانت بتلف ...

وأنا متعودة انى ماأجربش غير الحاجات المجربة والمقادير المتوافقة...
وبناء على خبرتى المتواضعة فى الكيك واللف والدوران فى النت ...
قررت اعملها كالآتى ...
بمقادير وطريقة الكيكة العادية بتاعتى بس بالزيت بدلاً من السمن ... ح يحصل ايه يعنى ؟؟

سخنى الفرن على درجة حرارة 220
وابدأى العمل كالآتى ....
3 بيض + 1.5 كوب سكر + نصف كوب زيت + كوب لبن
ويضرب جيداً فى الخلاط ...
ويضاف اليه نصف ملعقة قرفة ناعمة ...
ثم يصب الخليط على 2.5 كوب دقيق + باكو بيكنج بودر
ويقلب مثل الكيكة العادية
ثم يضاف اليه 3او 4 موزات مقطعة قطع صغيرة ...
ويقلب ويصب فى صينية
مقاس 28 مدهونة بالسمن والدقيق
ويضاف حوالى نصف كوب أو أكثر من الجوز(عين الجمل) المقطع فوق الوش ...
وتدخل فى الفرن لمدة 20 -25 دقيقة ...
تخرج من الفرن زى الصورة وتبرد تماماً ثم تقطع وتقدم ..
ريحتها تحفة وطعمها حلو قوى ...

أقتراحات للتقديم ..
1- تقدم سادة مع كوب نسكافيه او قهوة
2- ترش فوق سطحها صوص شيكولاته او كرامل..
3- توضع مع بولة ايس كريم فانيليا او كرامل ...
ألف هنا ...